Presidenti Meta i është drejtuar zyrtarisht kreut të Komisionit Qendror të Zgjedhjeve, Klement Zguri ku i kërkon listën emërore të deputetëve aktual të Kuvendit të Shqipërisë.
Kërkesa vjen në një kohë kur opozita vendosi të djegë mandatet dhe një pjesë e këtyre janë zëvendësuar nga listat shumë emërore.
Aktualisht, Parlamentit i mungojnë 18 deputetë pas shterimit të listave të opozitës për plotësimin e vendeve vakante.
“Në muajin shkurt 2019 deputetët e partive opozitare kanë deklaruar publikisht dhe kanë depozituar pranë Kuvendit të Shqipërisë dorëheqjet në bllok nga ushtrimi i mandateve të tyre si deputetë të Kuvendit të Shqipërisë.
Nga sa është bërë publike Sekretari i Përgjithshëm i Kuvendit pa vonesë ka njoftuar KQZ-në, për krijimin e vakancave në Kuvendin e Shqipërisë si pasojë e këtyre dorëheqjeve.
Komisioni Qendror i Zgjedhjeve ka marrë vendim për dhënien e mandatit të deputetit të Kuvendit të Republikës së Shqipërisë për kandidatët sipas listës shumë-emërore të çdo subjekti zgjedhor për çdo zonë zgjedhore.
Cili është numri aktual i mandateve të deputetëve të Kuvendit të Shqipërisë në shkallë vendi?
Vënien në dispozicion të listës emërore të deputetëve aktuale të Kuvendit të Shqipërisë për çdo zonë zgjedhore dhe për çdo subjekt, sipas listës emërore të deputetëve aktuale në shkallë vendi”, thuhet në kërkesën e Metës.
