Policia e Lezhës ka finalizuar operacionin e koduar “Reagimi”, duke vënë në pranga një 28-vjeçar të dyshuar për tentativë vrasjeje ndaj nënës së bashkëjetueses së tij.
Sipas njoftimit zyrtar, në pranga është arrestuar shtetasi Cuf Behi, 28 vjeç, banues në Tiranë, i cili dyshohet se në orët e para të mëngjesit ka përplasur me automjet nënën e bashkëjetueses së tij, pas një konflikti të lidhur me marrëdhëniet familjare.
Ngjarja ka ndodhur rreth orës 02:05, në lagjen “Skënderbeg” në Lezhë. Sipas hetimeve paraprake, i riu kishte shkuar për të marrë bashkëjetuesen e tij, por në momentin që familjarët e saj kanë dalë jashtë, ai dyshohet se ka goditur me automjet nënën e saj 43-vjeçare, duke i shkaktuar dëmtime trupore dhe më pas është larguar nga vendngjarja.
Falë reagimit të shpejtë të strukturave të Policisë, specialistëve për Hetimin e Krimeve dhe Forcës së Posaçme “Shqiponja”, autori i dyshuar u lokalizua, u kap dhe u arrestua në flagrancë.
43-vjeçarja e dëmtuar u dërgua në Spitalin e Traumës në Tiranë, ku po merr trajtim mjekësor.
Gjatë operacionit, policia sekuestroi edhe automjetin e përdorur në ngjarje, ndërsa ndaj 28-vjeçarit rëndon akuza për veprën penale “Vrasja për shkak të marrëdhënieve familjare”, e mbetur në tentativë.
Materialet procedurale i janë referuar Prokurorisë për veprime të mëtejshme.