Kreu i shtetit Ilir Meta do të ketë një komunikim me gazetarët pasditen e kësaj të enjte lidhur me ligjin që kaloi Kuvendi përsa i përket betimit të anëtarëve të Gjykatës Kushtetuese një ditë më parë.
Këshilltari për mediat i Metës, Tedi Blushi bën të ditur në Facebook se komunikimi do të bëhet pasi kreu i shtetit të takojë Delegacionin e Komisionit të Venecias, pikërisht për këtë çështje, përplasjen për emërimet në Kushtetuese që e ka kërkuar vetë Kuvendi.
POSTIMI I TEDI BLUSHIT
Të nderuar kolegë gazetarë!
Kam marrë shumë pyetje nga ju, lidhur me ligjin që ka kaluar Kuvendi dje në mbrëmje vonë, nëse është apo jo në shkelje të Kushtetutës.
Së pari dua të shpreh çudinë e madhe që ky ligj miratohet në errësirë të plotë, vetëm pak orë para fillimit të takimeve të Komisionit të Venecias në Tiranë, të thirrur nga vetë Kuvendi, që tregon një mungesë serioziteti të plotë, panik për ngut dhe fakt të kryer.
Pra KAP ÇFARË TË KAPËSH.
Së dyti, për ne tashmë çudi përbën vetëm fakti kur ndonjëherë Kuvendi kalon ndonjë ligj që respekton Kushtetutën, pasi dhunimi sistematik i saj është kthyer në rregull.
Por sot paradite jemi të fokusuar te takimi me përfaqësuesit e Komisionit të Venecias.
Ndërsa pasdite ju premtoj se Presidenti do të kuvendojë me ju direkt nga Presidenca, dhe me të gjithë shqiptarët, për qëllimin e vërtetë të ligjit për KRYEKÇK-në.