Efektivi i Forcave të Ndërhyrjes së Shpejtë, Lutfi Gjyle i cili plagosi para pak ditësh shtetasin Myrtaz Lika në Kombinat është lënë në arrest me burg nga gjykata e Tiranës. Ngjarja ndodhi teksa të dy ishin ulur në lokal nën shoqërinë e njëri-tjetrit.
Ndërkohë, mësohet se efektivi ka deklaruar në gjykatë se arma i është shkrepur pa dashje.
Por, Drejtoria e Përgjithshme e Agjencisë së Mbikëqyrjes Policore bën me dije se efektivi 48-vjeçar e ka qëlluar me armë 60-vjecarin teksa po konsumonin pije alkoolike së bashku në një bar kafe. Teksa ishte i ulur në të njëjtën tavolinë me të, Gjyli ka përdorur armën e tij të shërbimit duke qëlluar në drejtim të 60-vjecarit.
I plagosuri u dërgua në spitalin e Traumës, pasi kishte marrë plagë plumbi në këmbë dhe ndodhet jashtë rrezikut për jetën.