Përgjatë ditës së djeshme në media është folur për aplikacionin digjital “Aktivisti” të cilin opozita e konsideron “mjet presioni” mbi administratën publike.
Në rrjet po qarkullon një listë me emrat e personave të regjistruar në aplikacion, pretendoi opozita e vendit duke derdhur një lum akuzash ndaj maxhorancës socialiste.
“Administrata detyrohet, skandal pjesëmarrja e prokurorëve. Drejtësia duhet ta hetojë si një krim zgjedhor”, u shpreh kreu i PL, Ilir Meta.
Ndërsa deputeti socialist, njëherazi edhe sekretari digjital i PS-së, Etjen Xhafaj u shpreh se “Lista është manipuluar. Do ta ndjekim në një rrugë ligjore”.
Por si qëndron e vërteta?
Fakti është që lista e aplikacionit ‘Aktivist’, nuk është gjë tjetër veçse lista e pagave që rodhi në publik nga sulmi i hakerave iranian, shkruan Tirananews.al.
Këtë herë, nga format “Excel’, kjo listë është konvertuar në format elektronik ‘PDF’ dhe pjesë e saj janë emra të selektuar, eksponent të rëndësishëm të politikës dhe gjyqësorit.
Opozita pretendoi se pjesë e këtij aplikacioni janë shumë zyrtarë të organeve të drejtësisë, si gjyqtarë, prokurorë, duke iu referuar një liste përdoruesish të bërë publike.
Në të vërtetë kjo listë nuk i përket aplikacionit, e ndërsa emrat dhe të dhënat e tjera që gjenden në listën e re, janë marrë ‘copy – paste’ nga listat “Pagat”, e publikuar nga hakerat iranianë në dhjetor të vitit 2021.
Tirananews.al