Në një kohë që Lefter Koka, deputet i LSI-së që nuk hoqi dorë nga mandati thotë se është ende pjesë e LSI, nga zyra e kësaj partie vjen dhe vendimi për çregjistrimin e anëtarëve që kanë thyer rregullin e partisë.
Duke dalë nga salla e seancave plenare Lefter Koka tha se nuk ka ambicie për të qenë kryetar bashkie, post të cilin e ka mbajtur më herët dhe se qëndroi në parlament për të votuar reformën zgjedhore.
Por LSI nëpërmjet publikimit të vendimit të partisë, që mban datën 22 shkurt, i bën të ditur Kokës se nuk është më pjesë e saj.
“Çregjistrimin nga regjistri i anëtarësisë i Lëvizjes Socialiste për Integrim për kandidatët e regjistruar në listën shumëemërore të Lëvizjes Socialiste për Integrim në zgjedhjet për Kuvend të Shqipërisë të datës 25 qershor 2017, të cilët thyejnë vendimin politik të Lëvizjes Socialiste për Initegrim për djegien e mandateve”, thuhet në vendimin e LSI-së.
Vendimi thotë më tej se çregjistrimi do të bëhet individualisht për çdo deputet dhe ata nga lista që pranojnë të marrin mandatin.
