Ekipi kuqezi ka marrë një lajm të keq para sfidës vendimtare kualifikuese të Botërorit kundër Serbisë, që do të luhet me 11 tetor. Fjala është për mbrojtësin kuqezi, Marash Kumbulla, i cili është dëmtuar gjatë ndeshjes së kampionatit spanjoll mes Mallorcas dhe Atletico Madridit.
Siç edhe u pa, qendërmbrojtësi u detyrua të largohej nga fusha që në minutën e 36-të, duke shqetësuar stafin teknik të Mallorcas, por edhe trajnerin Sylvinho. Këtë të hënë pritet që analizat mjekësore të përcaktojnë shkallën e dëmtimit dhe kohën e mungesës së mundshme.
Kumbulla vuajti një lëndim sezonin e shkuar, por rikthimi me Espanyolin (në huazim nga Roma) la mbresa për lojën dhe cilësitë në prapavijë. Edhe këtë sezon Roma vendosi ta huazonte në La Liga, por me fanellën e Mallorcas, klub me të cilin ka zhvilluar katër paraqitje këtë fillimsezoni.