Presidenti amerikan, Donald Trump, deklaroi se udhëheqësit e Iranit kanë frikë të pranojnë publikisht se po negociojnë me Shtetet e Bashkuara, mes tensioneve të vazhdueshme mes dy vendeve.
Deklarata e tij erdhi pasi ministri i Jashtëm iranian, Abbas Araghchi, u shpreh për mediat shtetërore se Irani nuk ka ndërmend të negociojë për momentin dhe se vendi do të vazhdojë të mbrojë veten.
Megjithatë, mesazhet e përziera nga Uashingtoni sugjerojnë se administrata amerikane nuk ka ende një strategji të qartë për daljen nga situata aktuale.
Sipas burimeve nga Shtëpia e Bardhë, SHBA-ja është shumë afër arritjes së objektivave të saj, ndërsa pretendohet se Irani po kërkon një rrugë daljeje nga konflikti.
Nga ana tjetër, një zyrtar iranian ka bërë të ditur se Teherani ka paraqitur pesë kushte për përfundimin e luftës, duke përfshirë ndalimin e konfliktit në të gjitha frontet dhe pagesën e dëmshpërblimeve.
Raportimet vijnë në një kohë kur Irani thuhet se ka marrë një plan me 15 pika nga SHBA-ja. Fillimisht, Teherani e hodhi poshtë këtë propozim, por më vonë Araghchi la të hapur mundësinë për një qëndrim të ri, duke deklaruar se “nëse duhet të merret një vendim, ai me siguri do të përcaktohet”.