Britania e Madhe ka konfirmuar vdekjen e një shtetasi të saj që luftonte përkrah forcave ukrainase kundër trupave ruse. Zyrtarët britanikë kanë refuzuar të japin identitetin e ushtarit por sipas BBC ai quhet Scott Sibley, i cili mësohet se ka qenë një ish-anëtar i forcave të armatosura britanike.
Zyra e Jashtme tha gjithashtu se ishte në dijeni të një shtetasi të dytë britanik i cili ishte zhdukur në Ukrainë dhe se po kërkonte urgjentisht informacione të mëtejshme.
Qeveria britanike ka deklaruar se po mbështet familjen e personit të zhdukur, ndërsa burimet diplomatike bëjnë të ditur se ka shumë të ngjarë që dy individët të ishin vullnetarë të huaj që shërbenin me forcat e armatosura ukrainase në Mariupol ose në Donbas.
Autoritetet në Ukrainë kanë vlerësuar se të paktën 20 mijë njerëz kanë ardhur nga jashtë për t’iu bashkuar luftës kundër Rusisë.
Ka pasur sugjerime më parë se britanikët kanë vdekur në Ukrainë. Tre ish-anëtarë të forcave speciale të Mbretërisë së Bashkuar thuhet se u vranë në mars gjatë një sulmi me raketa ruse në një qendër trajnimi ushtarak pranë kufirit me Poloninë.
Por kjo nuk u konfirmua kurrë. Javën e kaluar dy luftëtarë britanikë – Shaun Pinner dhe Aiden Aslin – u kapën nga forcat ruse dhe u shfaqën në televizionin shtetëror ku kërkonin shkëmbimin e tyre me të burgosurit rusë në Ukrainë.