Ministri i Jashtëm rus, Sergei Lavrov, ka dhënë së fundmi një deklaratë rreth situatës aktuale të luftës si dhe komentoi ecurinë e bisedimeve të paqes mes Rusisë dhe Ukrainës. Kryediplomati rus akuzoi gjithashtu SHBA-të duke thënë se ato nuk dëshirojnë që negociatat të përfundojnë shpejt.
“SHBA nuk është në favor të një përfundimi të shpejtë të negociatave. SHBA dëshiron që të mbajë Rusinë në gjendje lufte, për aq kohë sa të jetë e mundur dhe të vazhdojë të furnizojë Ukrainën me armë”, tha ndër të tjera ministri.
Lavrov deklaron se Perëndimi është duke kërkuar vendosjen e një rend të ri botëror.
“Ajo që po ndodh në botë nuk ka të bëjë vetëm me Ukrainën dhe jo aq shumë, por përpjekjet për të krijuar një rend të ri botëror. Qëllimi është “të frenohet Rusia, si dhe çdo vend tjetër që vepron në mënyrë të pavarur në skenën globale. Si pjesë e drejtimit të marrë nga NATO drejt Rusisë, Ukraina është zgjedhur si një instrument për të shtypur pavarësinë e Rusisë,” u shpreh Lavrov.
Sa i përket bisedimeve Rusi-Ukrainë, Ministri i Jashtëm rus tha se negociatat janë të vështira për arsye se Kievi vazhdimisht po ndryshon pozicion.
“Rusia nuk është kundër ndërmjetësimit, por negociatat janë të vështira sepse delegacioni i Kievit po ndryshon shpesh pozicionet”, u shpreh Lavrov.