Punonjësit të një pike karburanti në Bilisht, në mesnatë iu dogj makina. Babai i Marsel Buçit hedh akuza ndaj Deizi Arapit. Në një prononcim për mediat, Urim Buçi u shpreh se për mjetin ka punuar dhe se nga shteti kërkon drejtësi, por edhe kërkoi të dinte se ku i gjen paratë 27-vjeçarja.
“Në dy të natës u dëgjua një zhurmë dhe gruaja më tha ngrihu se i kanë vënë zjarrin makinës së djalit. U zgjuam dhe pamë që makina kishte marrë flakë e gjitha. Lajmërova policinë dhe erdhën në vendngjarje na morën në pyetje, ku dyshoni etj. Unë dyshimin e kam para një muaj, akuzoi djalin që ishte i futur nga dikush. Pas verifikimeve doli që im bir nuk kishte lidhje me ngjarjen. Pas dy ditësh, i del prap përpara me makinë djalit dhe filloi ta ofendojë. Qëndroi djali dhe i tha: Si e ke punën moj çupë e mbarë? S’vajti dy minuta, mori policinë në telefon dhe u tha filani më shau. Filloi sërish të sajonte gjëra, mori në telefon shefi komisariatit dhe i tha mos u merr me të. Mua më duket se kjo është ngjarje e qëllimshme. Unë kërkoj drejtësi nga shteti”.
Vetë Arapit i është djegur makina disa ditë më parë. Ajo në një deklaratë për media akuzoi se gjithçka vinte pas sherrit me deputetin e PD-së Bledion Nallbati. Si autor, ajo shënjestroi punonjësin e karburantit të Nallbatit, por pa i përmendur emrin. Dhe ai rezulton të jetë pikërisht Marsel Buçi.
“Në vendngjarje është gjetur një bidon benzine nga ky karburant ashtu si herën e kaluar. Policia nuk ka cilësuar ende asgjë. Ai po me ruante, dukej se ishtë në pritje të parkimit të makinës”,-thoshte Arapi.