Majlind Habibi ka dalë këtë të premte para gjykatës për t’u njohur me masën e sigurisë, pasi ai është autori i dyshuar i vrasjes së Branko Shkozës. 35-vjeçari ka ndryshuar qëndrim lidhur me ngjarjen, duke thënë se nuk është ai autori i vrasjes së Shkozës. Ai tha se në dëshminë e tij të parë e ka pranuar autorsinë e krimit, pasi është dhunuar nga efektivët e Policisë.
“Më datë 27 kam qenë pushim dhe e kam taku se nuk vinte te lokali i lagjes. Jam familjar, jam i pafajshëm, e kam pranu kot, jam hallexhi, kam djalin 4 vjeç dhe gruan shtatzënë. Zonja gjygjtare, më kanë ushtruar dhunë dhe e kam pranuar krimin. Me ka ikur nusja me djal dhe shtatzanë, m’u ka larguar nga frika”, tha Habibi.
Më herët Habibi tha se ngjarja kishte ndodhur pasi autori i kishte ngacmuar gruan, në gjaknxehtësi e sipër gjatë një konflikti. Gjykata e Durrësit e ka lënë në ”arrest me burg” Habibin. Ngjarja ndodhi në Spitallë të Durrësit, ku Habibi dyshohet se e shtyu viktimën nga një urë, ku edhe ndërroi jetë.