Kryebashkiaku i Matit Agron Malaj ka prezantuar sot trajnerin e ri të skuadrës së Burrelit. Gjatë një takimi me drejtues të klubit dhe gazetarë Presidenti i KF Burreli tha se Ditmar Bicajt i është besuar drejtimi i skuadrës verilindore, duke theksuar se kjo është një detyrë e rëndësishme për ecurinë e sportit të futbollit në këtë trevë.
“Ditmar Bicaj është trajneri i Burrelit për sezonin 2024-2025. Vjen në këtë detyrë pas një karriere të gjatë dhe brilante si futbollist dhe si një teknik me të ardhme. Në emër të sportdashësve të Burrelit, por edhe si numri një i Bashkisë Mat i uroj trajnerit të ri suksese dhe ta lartësojë futbollin matjanë”, tha Malaj.
Sipas kryetarit të Bashkisë matjanët e duan futbollin. Ky sport i bukur ka histori të gjatë, ndaj tifozët jo vetëm e duan skuadrën por edhe e mbështesin atë me gjithë zemër. Malaj tha se është shumë e rëndësishme që të ndërtojmë në fillim të kampionatit një skuadër të qëndrueshme dhe me synime të qarta.
Nga ana e tij tekniku Ditmar Bicaj falenderoj Presidentin e KF Burreli Agron Malaj për besimin e dhënë dhe u shpreh se do të bëjë maksimumin që futbolli në këtë qytet të ngjitet aty ku qytetarët e meritojnë.
“Është privilegj, tha Bicaj, të jem trajner i një skuadre me emër në futbollin shqiptar. Kjo është një sfidë dhe unë nuk kam frikë nga sfidat. Kryesore është t’i bëjmë bashkë të gjithë, lojtarët, tifozët, specialistët e drejtuesit vendor. Ka shumë rëndësi t’i kthejmë Burrelit dinjitetin e merituar”.
Bicaj shprehet se shpejt do të mundësohet grumbullimi i lojtarëve dhe do të nisë stërvitja e ekipit. Ai shtoi se ndryshimet do të bëhen të ditura për tifozët dhe mediat. Tekniku i qëndron idesë se lojtarët e huaj do të jenë në minorancë dhe se shumica e tyre do të jenë nga ekipet shqiptare.
“Ne, këmbënguli Bicaj, duhet të kemi lojtarë që e duan qytetin e Burrelit, e duan fanellën e veçantë të kësaj skuadre. Objektivi ynë është rezultati pozitiv në çdo ndeshje. Pres mbështetjen e tifozëve matjanë, të cilët janë një garanci e mirë për ecurinë e skuadrës”.
