Agron Malaj, kandidati socialist për një mandat të dytë në bashkinë e Matit ka nisur takimet përmbyllëse në njësitë administrative dhe blloqet e qytetit të Burrelit.
Malaj zhvilloi takimin elektoral me banorë të njësisë Administrative Rukaj dhe lagjes “Pjetër Budi”, Blloku nr.1 Burrel.
Kandidati Malaj tha se e mori drejtimin e bashkisë në vitin 2019 me një bilanc negativ dhe pavarësisht krizave të tërmetit, pandemisë dhe ekonomike, u implementuan me dhjetëra projekte me fonde të buxhetit të shtetit, donatorëve dhe OJF-ve.
Po ashtu Malaj shpalosi edhe prioritetet për mandatin e ardhshëm, ku një vëmendje të veçantë do të ketë infrastruktura rurale, shtrimi i rrugëve të 38 fshatrave me asfalt, investimet në veprat vaditëse, etj.
Malaj foli edhe për kundërshtarët politik të tij në këtë garë ku tha se nuk kanë bërë asgjë për Matin kur ishin në qeverisje. “Disa individë të djathtë në zemër kanë Saliun, vulën ua mban Alibeaj dhe votojnë Ilir Metën. Ata e kanë humbur rrugën në oborrin e shtëpisë së tyre”, tha Malaj në takimin e zhvilluar në Urakë. E pranishme në këtë takim, deputetja socialiste Aurora Mara kërkoi votën për Agron Malaj për një mandat tjetër 4-vjeçar në mënyrë që zhvillimi i Matit të ecë përpara dhe investimet të mos ndalen. Banorët e pranishëm premtuan se do të votojnë kandidatin Agron Malaj për të vijuar me projektet e shumta infrastrukturore në Mat.