Ministrja e Shëndetësisë dhe Mbrojtjes Sociale, Ogerta Manastirliu bashkë me deputetin Xhemal Qefalia kanë parë nga afër Qendrën e re Shëndetësore Zall-Bastar, pjesë e programit të rehabilitimit të 300 qendrave shëndetësore në vend. Në këtë kuadër, ministrja tha se po pilotohet me paketën e shërbimit në banesë, e cila poashtu përfshihet në qendrat shëndetësore.
“Në 30 vite nuk ishte vënë dorë. Qendra shëndetësore e Zall-Bastarit që i shërben më shumë se 5 mijë banorëve të kësaj zone, tashmë është në kushte bashkëkohore. Ne vijojmë të shtojmë shërbimet në qendrat tona shëndetësore. Kujdesi në banesë është një tjetër paketë e kujdesit shëndetësor shumë e rëndësishme që po përfshihet në qendrat tona. Dhe nga ana tjetër, ne do të vijojmë që të përmirësojmë shërbimet, duke përfshirë dhe shërbimet socio-shëndetësore, duke futur shërbimin psiko-social si pjesë të kujdesit shëndetësor”.
Ministrja e Shëndetësisë dhe Mbrojtjes Sociale u shpreh se ka filluar faza e dytë e programit të rehabilitimit dhe përmirësimit të infrastrukturës së qendrave shëndetësore, duke shtuar se synohet që brenda katër viteve të finalizohet përmirësimi i të gjithë kujdesit parësor kudo në Shqipëri.
Janë 40 qendra shëndetësore dhe ambulanca, të cilat kanë filluar tashmë rehabilitimin. Qeveria shqiptare ka përfunduar fazën e parë të Programit të Rehabilitimit të Qendrave Shëndetësore dhe Ambulancave me 300 qendra shëndetësore të rehabilituara dhe rindërtuara.