Ministrja e Shëndetësisë, Ogerta Manastirliu bëri të ditur se për të lehtësuar kapacitetet e QSUT, shërbimet e kirurgjisë së urgjencës dhe shërbimeve të tjera jo për COVID 19 do të kalojnë në spitalin e Traumës duke nisur nga dita e premte, pra 20 mars.
“Në zbatim të planit të veprimit të miratuar nga komitetit teknik dhe task force kemi vendosur që për të lehtësuar kapacitete e QSUT, zonat sanitare të sigurta për pacientë që trajtohen në spital jo për COVID 19, shërbimin e kirurgjisë të urgjencës dhe urologjisë të transferohen në spitalin e Traumës duke nisur nga dita e premte e kësaj jave. Spitali i Traumës do të mbështetet dhe nga kirurgët, anestezistët e radiologët e QSUT. Urgjencat kirurgjikale dhe patologji malinje për Tiranën do të bëhen në spitalin e Traumës”, tha Manastirliu.
Ajo bëri të ditur gjithashtu se brenda javës vjen dërgesa e radhës dhe se personeli mjekësore është i pajisur me materiale mbrojtëse. Gjithashtu ajo tha se ka shtim të respiratorëve në reaminacion duke u shprehur se është dyfishuar kapaciteti në spitali infektiv të QSUT.
Ministrja bëri të ditur se krahas ISHP, ku laboratori i virologjisë është furnizuar me kite shtesë, po përgatetmi që “të kryejmë këtë test dhe në QSUT duke punuar paralelisht për krijimin e kushteve të biosigurisë në laboratorin e mikrobiologjisë në QSUT”.
“Jemi vetëm në fillim të luftës, përkundrazi vijoni të zbatoni me rigorozitet rregullat. Kjo betejë do të vazhdojë dhe për ne si për të gjithë botën”, tha ministrja.