Maqedonia e Veriut i ka dhuruar tanke Ukrainës, të cilat, sipas Armatës dhe Ministrisë së Mbrojtjes janë tanke të gjeneratës së tretë, dhe duke marrë parasysh zhvillimin e teknologjisë, ato konsiderohen jo konkurruese dhe jo kompatibile.
Autoritetet nuk kanë saktësuar se sa tanke i janë dhuruar Ukrainës, por bëjnë të ditur se në periudhën në vijim duhet të shpenzohen mjete edhe për asgjësimin e tankeve tjera që i kan në dispozicion, pasi ato konsiderohen të padobishme për ushtrinë.
“Republika e Maqedonisë së Veriut, si një anëtare e besueshme e NATO-s, në përputhje me aleatët dhe partnerët e saj, duke respektuar integritetin territorial, sovranitetin dhe të drejtën e vetëmbrojtjes së Ukrainës, duke dënuar ashpër agresionin e Rusisë kundër Ukrainës, vendosi dërgimin e ndihmës për Ministrinë e Mbrojtjes së Ukrainës, me sasi të burimeve materiale”, thuhet në njoftimin e Ministrisë së Mbrojtjes.
Maqedonia e Veriut i ka dhuruar më parë Ukrainës pajisje mjekësore dhe ndihma tjera për popullatën civile.
Në deklaratën e ministrisë, thuhet se Maqedonia e Veriut në periudhën e ardhshme do të transformojë, përkatësisht do të shpërbëjë batalionin e tankeve dhe do të fillojë ngritjen e kapaciteteve moderne kundër takneve.
Gjithashtu thuhet se është në vazhdim e sipër projekti i prokurimit të mjeteve të blinduara të lehta, sipas marrëveshjes së vitit 2019 ndërmjet Qeverisë së Republikës së Maqedonisë së Veriut dhe Shteteve të Bashkuara të Amerikës.
Maqedonia e Veriut që në ditët e parë të agresionit rus i ka dhënë mbështetje qeverisë në Kiev, duke respektuar sovranitetin dhe integritetin territorial të Ukrainës, ndërsa ka mbështetur të gjitha vendimet për sanksione ndaj Rusisë./ Rel