Protokolli i anëtarësimi të Maqedonisë së Veriut në NATO firmoset mes ministrit të jashtëm maqedonas Nikola Dimitrov dhe Jens Stoltenberg, sekretarit të përgjithshëm të Aleancës.
Më pas do të jetë radha e parlamenteve të vendeve anëtare për ta ratifikuar protokollin, ndërsa Maqedonia e Veriut do të marrë pjesë në të gjitha mbledhjet e NATO-s në cilësinë e vendit të ftuar.
Ndërkohë, kryetari i Kuvendit të Greqisë, Nikos Vucis njoftoi se protokolli do të dorëzohet të enjten dhe do të shqyrtohet nga Komisioni kompetent për Mbrojtjen Kombëtare dhe Punët e Jashtme në Kuvendin e Greqisë, ndërsa të premten do të dalë para deputetëve grekë në seancë plenare, ku edhe do të votohet.
Greqia duket se do të jetë vendi i parë që do ta votojë atë, ndërsa është parashikuar që shqyrtimi në komision dhe seanca plenare të zgjasin nga një ditë. Që të votohet protokolli janë të nevojshme 151 vota, ndërsa pritet që të gjithë deputetët që votuan për ratifikimin e Marrëveshjes së Prespës, ta përkrahin anëtarësimin e Maqedonisë së Veriut në NATO.