Në Bibliotekën Qendrore të qytetit të Selanikut në Greqi, u zhvillua ceremonia e inagurimit të fondit të librit shqiptar, një marrëveshje kjo e cilësuar nga të dyja palët si e suksesshme ndërmjet Konsullatës së Përgjithshme të Republikës së Shqipërisë në Selanik dhe bashkisë qendrore të këtij qyteti.
Ky projekt i ideuar prej afro dy vitesh ndërmjet Konsullës Pavlina Evro Ylli dhe kryetar i Bashkisë së qytetit të Selanikut, Joani Boutari, u kurorëzua mbrëmjen e djeshme në ambientet e kësaj biblioteke.
Në pasurimin e fondit të kësaj biblioteke iu bashkëngjitën autorët më të spikatur të periudhave të ndryshme letrare si dhe shumë nga shkrimtarë e poetë, që jetojnë në diasporë. Ky eveniment mblodhi emra të shquar nga fusha e artit, intelektualë, përkthyes, dashamirës të librit, deputetë të parlamentit helen si dhe përfaqësues të pushtetit lokal.
Për të nderuar pjesëmarrësit aktori dhe regjisori Arqile Garo së bashku me aktoren Raimonda Aleksi interpretuan në shqip dhe greqisht një mori poezish nga poetët më të njohur të letërsisë shqipe.
Një mbështetje dhe ndihmesë të veçantë në realizimin e këtij evenimenti dhanë zv./Kryetarja e Bashkisë për Kulturën dhe Artin Helen znj. Elli Chrysidou, Presidenti i Unionit të Gazetarëve Shqiptarë, z. Aleksandër Çipa, znj. Elona Agolli nga shtëpia botuese “Dritëro Agolli”, z. Bujar Hudhri nga “Onufri”, si dhe Naim Zoto nga shtëpia botuese “Naimi”.
Në fjalën e saj përmbyllëse znj. Ylli, falënderoi të gjithë ata që mundësuan realizmin e kësaj ideje si dhe uroi çeljen e këndeve të ngjashme në bashki të tjera në Greqinë e veriut dhe pse jo, vepra nga autorë grekë të kenë këndin e tyre pranë bibliotekave më të mëdha të vendit tonë.
