Mbi 50 mijë shqiptarë pritet të jenë në Dortmund në ndeshjen ndaj Italisë. Ky lajm ka bërë që të reagojë edhe kryeministrin Edi Rama, i cili e konsideron sigurisht, të natyrshëm.
“50 mijë shqipe dhe 31 mijë azzuri në shkallët e arenës së Dortmundit nesër, ku i famshmi Mur i Verdhë i Borussias do të zëvendësohet për një natë nga Dallga Kuqezi e Shqipërisë”, shkroi ai në rrjetet sociale.
Sipas kreut të qeverisë Shqipëria e ka fituar Europianin e saj. Prandaj për të nuk ka rëndësi rezultati i ndeshjes me Italinë.
“Shqipëria e ka fituar Europianin e saj dhe s’ka më asgjë për të humbur, prandaj cilidoqoftë rezultati i ndeshjes mbrëmja e nesërme do të mbetet jo vetëm në historinë e futbollit shqiptar, po edhe në kujtesën e 10 milionë shqiptarëve”, shkroi ai.
Mediat raportojnë se biletat për sfidën ndaj Italisë janë “sold out”. Interesi i shqiptarëve ka qenë i madh të cilët do të shkojnë në Gjermani jo vetëm për ta parë ndeshjen në stadium, por edhe për ta ndjekur atë në fan zona-t e ngritura në qytetet ku do të zhvillojnë ndeshjet kuqezinjtë.
Jo më kot, nga mediat e huaja pritet që Shqipëria të ketë tifozët më të mirë që kanë udhëtuar drejt Gjermanisë.