Pas 11 orësh, është mbyllur procesi i votimit për zgjedhjet për kryetarin e Partisë Demokratike.
75 mijë anëtarë demokratë ishin thirrur për të votur, por deri më tani nuk dihet se sa ka qenë pjesëmarrja.
Një ndër kandidatët që ka shprehur rezerva të forta në këtë proces zgjedhor është Agron Shehaj, i cili pretendon se shumë nga vëzhguesit e tij janë larguar nga komisionerët pa të drejtë.
Gjithashtu kreu i komisionit zgjedhor në PD Jemin Gjana është shprehur se përfaqësuesit e Shehajt kanë shkelur rregullat duke përdorur dhe filmuar me telefon brenda ambienteve të votimit.
Gjithashtu edhe Edith Harxhi është shprehur se një pjesë e madhe e demokratëve nuk kanë gjetur emrin në lista një fenomen që do të ndikojë në rezultatin e këtyre zgjedhjeve.
Ndërkaq në një deklaratë për mediat në mesditë kreu i komisionit zgjedhor në PD, Jemin Gjana është shprehur se rezultati paraprak për fituesin e zgjedhjeve do të shpallet rreth mesnatës, ndërsa zyrtarisht do të shpallet të hënën paradite.
Votimi ka nisur në orën 08:00, ndërkohë kandidatë në garë për kreun e PD janë: Edit Harxhi, Fatbardh Kadilli, Lulzim Basha dhe Agron Shehaj.