Drejtoria e Ruajtjes së Organeve të Vetingut ka përballuar me sukses ngarkesën e lartë të Shërbimeve për sigurimin dhe ruajtjen e Komisionerëve, Gjyqtarëve të Kolegjit, objekteve ku ushtrojnë veprimtari organet e vetingut dhe gjatë seancave dëgjimore e gjyqësore.
Kjo drejtori ka kryer 271 shërbime sigurie gjatë zhvillimit të seancave gjyqësore (KPK dhe KPA) si dhe 1608 shërbime jashtë tirane. Objektet e Rëndësisë së Veçantë, të miratuara si të tilla me vendim të Këshillit të Ministrave, por dhe të tjera që e marrin këtë status përkohësisht kanë dy qëllime sigurie: së pari për të garantuar sigurinë e Personalitetit, në ambientet ku punon, banon apo zhvillon veprimtari dhe së dyti për ruajtjen e pronës publike/shtetërore nga dëmtimet, shkatërrimet, vjedhjet etj.
Siguria e objekteve është e organizuar nga dy struktura; ajo e sigurisë së brendshme që funksionon nga një njësi e vetme dhe ajo e sigurisë së jashtme që funksionon në katër njësi të veçanta. Gjatë vitit të kaluar njësia për sigurinë e brendshme ka përballuar me masa të plota 22 protesta të zhvilluara në objektet e ruajtura nga Garda.
Gjatë vitit 2019 nga Sektori për Sigurinë Fizike të Presidentit të Republikës janë kryer 559 shërbime, më shumë se viti paraardhës. Shërbimet e kryera specifikohen ato jashtë selie 354 detyra shërbimi, jashtë rrethi 172 detyra shërbimi dhe jashtë shtetit 33 detyra shërbimi.
Një nga mënyrat e sigurisë dhe nga më të rëndësishmet ka qenë dhe vazhdon të mbetet siguria e personaliteteve nëpërmjet informacionit duke përdorur metodat e kërkimit, grumbullimit, analizimit dhe shpërndarjes së tij.
Parësore vazhdon të mbetet bashkëpunimi me të gjitha strukturat inteligjente në Policinë e Shtetit, Drejtoritë Vendore të Policisë, Komisariatet e Policisë dhe Shërbimin Informativ të Shtetit.
Drejtuesit e strukturave operacionale para çdo fillim shërbimi, janë njohur me informacione paraprake të ardhura nga Sektori i Analizës dhe me situatën operative në zonën apo vendin ku do të zhvillojë aktivitet, qëndrojë apo lëvizë Personaliteti.
Në sigurinë e personaliteteve të larta shtetërore janë aplikuar masat e sigurisë edhe me mjete teknike, me qëllim zbulimin e lëndëve të dëmtimit në masë dhe ato eksplozive, të cilat kanë pasur efektet e veta pozitive. Krahas kontrollit me aparaturë janë përdorur me efikasitet edhe qentë eksploziv kërkues.
