Policia Rrugore është në gatishmëri gjatë fundjavës për të menaxhuar trafikun e për të parandaluar aksidentet e mundshme. Siç bëri të ditur një ditë më parë Policia e Shtetit, vetëm 550 punonjës të Policisë Rrugore, radarë, kamera, alkoolteste, automjete të uniformuara dhe motoçikleta janë në terren.
Kontrollet në rrugën Tiranë-Durrës- Tiranë dhe Sauk-TEG- Kashar kanë treguar se në vetëm katër orë janë pezulluar 12 leje drejtimi pasi ecnin me shpejtësi tej normave që arrin deri në 152 km/h në një kohë kur fluksi i mjeteve ishte ende i lartë.
” Ndërsa gjatë 24 orëve të fundit në të gjithë vendin gjatë monitorimit me radar 📸 të rrugëve urbane dhe interurbane, nga ana e Policisë Rrugore janë pezulluar 103 Leje Drejtimi për shpejtësi që varionte deri në 170 km/h.
Ndërkohë deri tani gjatë kontrolleve duke përdorur alkooltestin, në të gjithë vendin janë arrestuar 7 drejtues mjetesh që drejtonin mjetin në gjendje të dehur.
Një kombinim sa i frikshëm aq dhe i rrezikshëm për sigurinë rrugore dhe atë publike, një automjet qe drejtohet nga drejtues nën efektin e alkoolit dhe më keq akoma në gjendje të dehur apo me shpejtësi mbi normat e lejuara deri në dyfishin e limit që lejon tabela është një rrezik potencial për jetën e drejtuesit të mjetit dhe këdo që përdor rrugën”, njofton policia e shtetit.