Në një kohë kur marrëdhëniet ndërmjet Tiranës dhe Athinës janë tensionuar për shkak të arrestimit të kryetarit të zgjedhur të bashkisë së Himarës, Fredi Beleri, Kryeministri i Greqisë, Kyriakos Mitsotakis, në 21 gusht do të mirëpresë në një darkë informale liderët e rajonit, por nuk ka ftuar kryeministrin shqiptar Edi Rama.
Kjo u interpretua si një hakmarrje e Athinës zyrtare ndaj kryeministrit Rama duke mos e ftuar. Në darkën informale, Greqia zgjodhi Presidentin, por Bajram Begaj e bojkotoi ftesën me argumentin e agjendës së përcaktuar më parë. Mediat greke shkruajnë sot se meazhi i Kyriakos Mitsotakis ishte i qartë për Edi Ramën: “përçarja po thellohet”.
“Nuk mund të kalojë pa u vënë re vendimi i kryeministrit Kyriakos Mitsotakis për të mos i dërguar ftesë Edi Ramës për darkën e liderëve të Ballkanit Perëndimor në Athinë, por presidentit të Shqipërisë. Kjo është një lëvizje diplomatike, por që përbën një “mesazh” për vendimin e qeverisë shqiptare për të tërhequr litarin në çështjen Fredi Beleri , i cili jo vetëm vazhdon të jetë në paraburgim, por nuk është lejuar as të betohet si kryetar i Bashkisë Himarë.
Vendimi i Athinës për t’i dërguar një ftesë presidentit të Shqipërisë, Begaj, pasqyron synimin për t’i dërguar një mesazh shqetësimi Edi Ramës, si në rastin përkatës të Maqedonisë së Veriut, ku presidenti gjithashtu ka kompetenca të kufizuara dhe kryeministri ka pushtetin e vërtetë, një ftesë iu dërgua kryeministrit Dimitar Kovaçevskit.