Ish-ministri i Mbrojtjes, Fatmir Mediu ka hequr dorë nga kërkesa për gjykim të shkurtuar në Gjykatën e Posaçme. Avokatët u shprehën se kanë prova dhe dëshmi të reja të cilat do t’i paraqesin para drejtësisë.
Po ashtu, ata kanë kërkuar ekspertizë të re për të përcaktuar shkaqet e shpërthimit në Gërdec, që sipas tyre do të përcaktonte nëse ka qenë rastësor apo i qëllimshëm.
Avokatët thanë se do të kërkojnë pyetjen e dëshmitarëve që nuk janë pyetur me herët, pyetjen e të pandehurve për të cilët ka përfunduar gjykimi dhe kryerjen e një akt-ekspertimi të ri për shkakun e shpërthimit të Gërdecit.
“Ne nuk besojmë se shpërthimi ishte aksident. Kemi indicie për zjarrvënie të qëllimshme në fabrikën e demontimit”, tha avokati Ardian Visha.