Në Liqenin e Ohrit dhe të Prespës është ndaluar peshkimi.
Ministri i Bujqësisë dhe Zhvillimit Rural, Bledi Çuçi, miratoi urdhrin e ndalimit që është marrë më 19 prill, por u botua sot në Fletoren Zyrtare.
Ndalimi i peshkimit është i vlefshëm vetëm për një periudhë kohore nga 20 prilli deri më 1 korrik, që përkon edhe me sezonin e shumimit të peshqve.
Sipas vendimit, nuk do të lejohet peshkimi me çfarëdolloj mjeti i peshqve të familjes së krapit, duke përfshirë edhe koranin.
Vendimi i plotë:
URDHËROJ:
Ndalimin e peshkimit, me çfarëdolloj mjeti dhe metode gjuetie, si dhe mbajtjen në bord, tranzitimin në barkë, zbarkimin e qëllimtë dhe hedhja në treg ose për konsum i të gjitha llojeve të peshqve të familjes së krapit në liqenin e Ohrit dhe të Prespës dhe konkretisht:
a) për liqenin e Ohrit, për periudhën 20.4.2019 deri më 1.7.2019.
b) për liqenin e Prespës, për periudhën 25.4.2019 deri më 25.5.2019.
Ndalimin e peshkimit me rrjeta në fashën breg/liqenore prej 300 ml nga bregu (për liqenin e Ohrit) dhe 150 metra (për liqenin e Prespës) dhe konkretisht:
a) për liqenin e Ohrit, për periudhën 1.7.2019 deri më 31.7.2019.
b) për liqenin e Prespës, për periudhën 25.5.2019 deri më 25.6.2019.
Vendbazimi i varkave të peshkimit do të jetë në pikat e caktuara nga OMP-të.
Për zbatimin e këtij urdhri, të hartohet një plan i Përbashkët Operativ Veprimi nga Drejtoria e Shërbimeve të Peshkimit dhe Akuakulturësnë koordinim me OMP-të përkatëse që ushtrojnë aktivitet peshkimi në këto dy liqene.
Ngarkohet Drejtoria e Politikave dhe Strategjive të Bujqësisë, Sigurisë Ushqimore dhe Zhvillimit Rural, Drejtoria e Shërbimeve të Peshkimit dhe Akuakulturës në vartësi të së cilës është Sektori i Inspektimit e Kontrollit të Peshkimit, Organizatat e Menaxhimit të Peshkimit të liqeneve të Ohrit e Prespës, që të monitorojnë zbatimin e Planit Operativ të Veprimit për zbatimin e këtij urdhri, duke bashkëpunuar me strukturat eqeverisjes vendore të Pogradecit e Korçës, Drejtorinë e Policisë së Rendit dhe atë Kufitare në Qarkun e Korçës dhe Autoritetin Kombëtar të Ushqimit të Qarkut Korçë.