Ministrja e Arsimit Evis Kushi ka paralajmëruar se vendimi i Komitetit për mësimin me turne mund të ndryshojë.
“Unë i mirëkuptoj të gjithë prindërit që janë të shqetësuar për cilësinë e arsimit që marrin fëmijët e tyre, kohëzgjatjen apo turnet që jemi të detyruar në disa shkolla të vendit ti aplikojmë. Të gjithë e dimë shumë mirë që jemi ende në situatë pandemie, ende në betejë me COVID 19 dhe për këtë arsye një nga rregullat që ne duhet të zbatojmë në shkollat tona është dhe distanca fizike mes nxënësve. për këtë arsye në ato klasa ku numri i nxënësve është i lartë dhe nuk e lejon distancën e parashikuar nga udhëzuesi jemi të detyruar që të zbatojmë turne dhe klasa të mos ketë më shumë se 15 nxënës. Dua ti qetësoj prindërit duke u thënë që nuk është vendim definitiv që do aplikohet për të gjithë vitin shkollor, është vendimi i parë sipas situatës që komiteti i ekspertëve na ka sugjeruar që për momentin do zbatojmë këtë skenar. Po komiteti e vlerëson situatën në një sistem javor, dy javor, kështu që shumë shpejt do të ketë një vendim tjetër duke shpresuar që dhe procesi i vaksinimit masiv, sidomos i mësuesve do të na çojë drejt normalizimit”, tha Kushi.
Ajo bëri të ditur se 87% e mësuesve sot janë të vaksinuar. 71% prj tyre me të dyja dozat dhe nje pjesë e vogël kanë marrë dozën e parë dhe shumë shpejt dozën e dytë.