Presidenti Ilir Meta ka refuzuar propozimin për emërimin e Gent Cakajt ministër të Jashtëm në vend të Ditmir Bushatit. Dekreti prej pesë faqesh i është kthyer kryeministrit Edi Rama për rishqyrtim këtë të enjte. Kreu i shtetit rendit arsyet e kthimit të dekretit duke theksuar se Cakaj nuk ka përvojë politike dhe diplomatike si dhe ka mbajtur qëndrime publike të papranueshme për çështjen e kufijve të Kosovës si dhe ka cenuar informacionin e klasifikuar.
Kujtojmë se Presidenti Ilir Meta nuk e ka dekretuar propozimin për shkarkimin e Ministrit për Europën dhe Punët e Jashtme, Ditmir Bushati, e për rrjedhojë ai do të vijojë të qëndrojë në krye të diplomacisë Shqioptare.
Presidenti Meta u shpreh edhe më herët në një intervistë televizive se ” MPEJ është një pozicion tepër i rëndësishëm dhe delikat. Çdo pozicion ministri është i tillë, por arsyet rreth përfshirjes së Shqipërisë në disa iniciativa mjaft të rëndësishme si në Trojkën e OSBE-së, kërkon vazhdimësie, për arsye të integrimit europian dhe për çdo gjë tjetër. Dhe mendoj se Shqipëria nuk duhet të jetë për asnjë sekondë pa ministër të Jashtëm.
/Tirananews.al