Kryetari i Partisë së Lirisë, Ilir Meta ka deklaruar se nuk mund të ketë integrim europian të vendit në një situatë ku ka rënë sistemi ligjor. I ftuar në emisionin “Spotlight”, Meta u shpreh se kryeministri Rama i ka uzurpuar të gjitha pushtetet që nuk i takojnë, ndërsa disa iu falën nga vetë opozita.
Ilir Meta: LSI për fat të keq e humbi misionin padashje për shkak të disa vendimeve që mori dhe që e nxorrën nga misioni i saj si forca që garantonte integrimin europian të vendit. U krijua për të zhbllokuar këtë çështje. Aktualisht nuk është prioriteti numër një. Këtu kemi problemin kryesor që ka rënë sistemi demokratik, shteti ligjor dhe janë shkelur liritë dhe të drejtat themelore të njeriut. Që nga liria e shprehjes, liria ekonomike, sipërmarrjes, konkurrenca.
Kuptohet se në rast se do kesh prioritet integrimin europian kur ka rënë sistemi, do të thotë se je një Donkishot. Vetëm kur shteti është i lirë, atëherë mund të ecësh drejt rrugës europiane. Progresraporti thotë se kanë rënë me 30% shkëmbimet e informacioneve mes policisë tonë dhe atyre të huaja. Është një rënie e sistemit që duhet ringritur. Ky është thelbi i Partisë së Lirisë.
Nuk ka një bazë ideologjike pasi nuk është problemi i karakterit të ngushtë ideologjik. Vetë PS duhet të ishte partia e mbrojtjes së shtresave më të thjeshta të shoqërisë. Duhet të ishte një parti që ka një raport me integritet me këtë shtresë të shoqërisë. Nëse do shihni raportin e Shqipërisë përpara 90’, të gjithë treguesit socialë janë përkeqësuar. Nuk është çështje që të bëhemi më të majtë apo të djathtë. Duhet të garantojmë atë sukses që i jep zgjidhje. Ka humbur ky kontroll i qytetarëve. Rama do që të uzurpojë pushtete që nuk i takojnë. Opozita ka fajin e saj duke i lënë të gjithë pushtetet Edi Ramës.