Presidenti Ilir Meta reagoi mbrëmjen e sotme në ditën e tretë të protestës kundër rritjes së çmimeve, në kryeqytet dhe në disa qytete të vendit.
“I bëj thirrje Qeverisë të dëshmojë ndjeshmërinë dhe përgjegjësinë e duhur në adresimin e të gjitha çështjeve që po shqetësojnë me të drejtë qytetarët, të cilët prej ditësh po protestojnë, në mbarë vendin, për dinjitetin dhe të drejtat e tyre thelbësore”, u shpreh Meta.
“Policisë së Shtetit i tërheq vëmendjen për t’u distancuar nga dhuna e papranueshme dhe ndalimet e pajustifikuara”, përfundoi mesazhi i Presidentit Meta.
Protestuesit pas grumbullimit para Kryeministrisë pasditen e sotme, marshuan përgjatë bulevardit dhe sheshit “Skënderbej” dhe më pas bllokuan qarkullimin në disa akse rrugore.