Analisti Milaim Zeka u shpreh se konflikti në Bruksel, më 14 shkurt, erdhi nga Albin Kurti, pasi kryeministri i Kosovës e quajti zyrtarin e lartë të BE, Josep Borrell gënjeshtar.
I ftuar në “TopTalk”, Zeka tregon se Kurti i ka propozuar ndërmjetësuesve të lartë një dokument, të cilët ata e kanë refuzuar, duke i thënë se të njëjtën gjë kanë bërë edhe me Serbinë.
Kurti duke u treguar mosbesues u ka kërkuar që ta shohë dokumentin e propozuar nga Serbia, thotë Zeka. Pasi ky dokument u vonua, Kurti akuzoi Josep Borrell se një dokument i tillë nuk ekzistonte por po përgatitej tani.
“Në këtë kohë pauze dy orëshe, Albin Kurti i tha Borell-it dhe Lajçakut se ‘nuk është e vërtetë që ju e keni këtë dokument dhe po e përgatisni tani për të më vënë mu në lajthitje’. Borrell i tha: ‘Ju po më akuzoni mua që jam gënjeshtar?’ Dhe në këtë moment u ngrit dhe e mbylli takimin”, tha analisti.
“Kjo është prapaskena që është luajtur nga një njeri i çmendur si Albin Kurti, i cili shkon në Bruksel vetëm për të krijuar përçarje. Unë nuk kam hallin e Albin Kurtit, kam hallin e Kosovës dhe Shqiptarëve. Unë e kam thënë që ne do ta humbin Kosovën kur në krye të vendit do të na vijë dikush që do ta armiqësojë Kosovën me SHBA dhe Be”, u shpreh Zeka në Top Talk.