Ministri i Brendshëm Taulant Balla është takuar me të Ngarkuarin me Punë të SHBA-së në Tiranë David Wisner. Gjatë takimit u diskutua mbi forcimin e bashkëpunimit dy palësh në luftë ndaj krimit të organizuar dhe narkotikëve.
“Gjatë takimit Balla dhe Wisner diskutuan mbi partneritetin dhe bashkëpunimin mes Shqipërisë dhe Shteteve të Bashkuara të Amerikës në fushën e zbatimit të ligjit, duke u fokusuar në luftën kundër krimit të organizuar dhe trafikut të paligjshëm të narkotikëve”, njofton Ministria e Brendshme.
Në një postim në rrjetet sociale, Balla shkruan se është mirënjohës SHBA-ve për bashkëpunimin në kapjen e një të shumëkërkuari në Shqipëri.
“Mirënjohës për bashkëpunimin e shkëlqyer mes Policisë së Shtetit, DEA-s Amerikane dhe Policisë së Kosovës në operacionin për arrestimin e një personi shumë të kërkuar nga drejtësia pak ditë më parë”, shkruan ministri Balla.