Ministri për Evropën dhe Punët e Jashtme, Ferit Hoxha, po merr pjesë në edicionin e 19-të të Forumit të Dubrovnikut në Kroaci, ku u prit nga homologu i tij kroat, Gordan Grlić Radman.
Përmes një postimi në rrjetin social X, Hoxha e cilësoi forumin si një platformë të rëndësishme për diskutimet mbi të ardhmen e Evropës, sigurinë rajonale dhe sfidat globale.
“Ky edicion i 19-të i Forumit është i përqendruar në temën: Epoka e Multipolaritetit: Shumë Drejtime, Një e Ardhme. Megjithatë, për Shqipërinë ka vetëm një drejtim që të çon drejt të ardhmes sonë: anëtarësimi në BE”, shkroi Hoxha.
Ministri theksoi se, ndërsa Shqipëria vijon rrugën drejt integrimit evropian, mbetet e angazhuar për forcimin e bashkëpunimit rajonal, mbështetjen e vlerave euroatlantike dhe bashkëpunimin e ngushtë me partnerët ndërkombëtarë për ndërtimin e një Evrope më të sigurt, më të qëndrueshme dhe më të begatë.