Siguria publike, mbarëvajtja e sezonit turistik dhe menaxhimi i situatave të zjarreve kanë qenë në fokus të takimit që ministri i Punëve të Brendshme, Besfort Lamallari, zhvilloi me 12 prefektët e qarqeve të vendit.
Gjatë mbledhjes u diskutuan prioritetet e punës për muajt në vijim, ndërsa ministri kërkoi forcimin e bashkëpunimit ndërinstitucional dhe rritjen e pranisë në terren, me synim reagim më të shpejtë dhe zgjidhje efektive për problematikat që prekin qytetarët.
Vëmendje të veçantë mori funksionimi i Këshillave Vendorë të Sigurisë Publike. Lamallari u bëri thirrje institucioneve përgjegjëse të angazhohen më shumë në punën e tyre, duke theksuar se sfidat aktuale kërkojnë koordinim të vazhdueshëm, reagim në kohë dhe rezultate konkrete, jo administrim rutinë.
Ministri nënvizoi se besimi i qytetarëve ndaj institucioneve lidhet drejtpërdrejt me sigurinë që ata ndiejnë në jetën e përditshme dhe me cilësinë e shërbimeve që marrin, ndaj çdo strukturë shtetërore duhet të përmbushë me përgjegjësi detyrat e saj.
Në përfundim të takimit, Lamallari vlerësoi rolin e prefektëve si përfaqësues të Qeverisë në territor dhe si hallkë kyçe në koordinimin e institucioneve, për zbatimin e politikave publike dhe garantimin e rezultateve konkrete në shërbim të qytetarëve.