Nga Lezha, ministri i Mbrojtjes Niko Peleshi ka komentuar situatën e krijuar nga reshjet intensive të shiut në të gjithë vendin. Ministri tha se në Malësinë e Madhe janë bërë tre evakuuime, teksa shtoi se në Bërdicë Forcat e Armatosura po ndihmojnë banorët por nuk ka pasur nevojë për evakuim.
“Jemi në gatishmëri në të gjithë Shqipërinë. Këto reshje nga një anë na japin lajmin e mirë për mbushjen e rezervave por ka edhe sfidën për përballjen me to. Duhet të na mirëkuptojnë qytetarët që në disa zona ndërprerja e energjisë bëhet për arsye sigurie, ndërpritet energjia sa të qetësohet situata.
FA janë në krye të punës për të ndihmuar qytetarët të kapërcejnë këtë pikë nevralgjike, harkun e Bërdicës. Janë katër banesa që po i mbajmë në monitorim sepse rrezikojnë përmbytjen. Tre familje janë evakuuar”, tha Peleshi.