Ministria e Infrastrukturës dhe Energjisë do të hapë dyert për studentët që ata të zhvillojnë praktikat mësimore, ndërsa do të realizohet edhe punësimi i studentëve ekselentë.
Kështu deklaroi sot, Ministrja për Infrastrukturën dhe Energjinë, Belinda Balluku, duke folur në takimin e organizuar për prezantimin e Paktit për Universitetin.
Duke folur për procesin e patronazhimit të universiteteve nga ministritë, Balluku tha se Ministria e Infrastrukturës dhe Energjisë ka marrë në patronazh Universitetin Politeknik të Tiranës.
“Ne evidentuam problematikat e ngritura dhe mundësitë dhe zgjidhjet që mund të ofroheshin. Konkretisht në Universitetin e Inxhinierisë së Ndërtimit është një ndërtesë që ndodhet pas godinës së fakulteteve, që mund të shndërrohet në një ndërtesë multimodale. Aty do të ketë edhe disa nga zyrat e arkitekturës, private, që do të zhvillojnë projektet e tyre, por do t’i jepet një pjesë universitetit, e cila mund të përdoret nga studentët si laborator për praktikat”, tha ajo.
Një tjetër çështje, sipas Ballukut, ka të bëjë me praktikat e studentëve, të cilat janë shumë të rëndësishme për studentët pasi kanë kreditet e tyre.
Balluku shtoi se Ministria e Industrisë dhe Energjetikës, ka marrë përsipër me numra të saktë për të realizuar praktikat e studentëve.
“Ministria ka marrë në patronazh që të përmirësojmë financat e universitetit përmes bashkëpunimit me Ministrinë. Kjo mund të bëhet përmes kërkimeve studimore, konsulencës që fakulteti mund të na ofrojë dhe gjithçka që ju mund të prodhoni në shërbim të Ministrisë”, deklaroi Ministrja.