Ministrja Gjonaj jep lajmin e mirë: Po punohet për amnistinë, kritere më lehtësuese për gratë dhe të miturit

Ministrja e Drejtësisë Etilda Gjonaj ka përcjellë një lajm të mirë nga emisioni “Real Story” për të gjithë të dënuarit dhe familjarët e tyre, ku ka nënvizuar se po përgatitet me kujdes një draft i hollësishëm për amnistinë, duke i qëndruar strikt të gjitha kritereve të lejuar amnistinë.

E prerë në qëndimin e saj, Gjonaj zgjodhi të mos përcjellë shumë detaje, ku ndër të tjera theksoi se disa vepra nuk do të mund të amnistohen.

Ministria tha se momentalisht është një fazë diskutimi me Prokurorinë e Përgjithshmë për kategorinë e veprave penale të cilat do të përfitojnë.

Gjonaj u shpreh fillimisht se drafti u shty për shkak të zgjedhjeve të 30 qershorit, ndërsa tani është duke u diskutuar me institucionet e tjera përgjegjëse.

“Presidenti nuk ka rol në amnisti, por ka rol në falje me propozim të Ministrisë së Drejtësisë. Amnistia bëhet me ligj, vjen nga qeveria dhe i drejtohet parlamentit. Ministria e Drejtësisë në këtë proces nuk është vetëm, sepse konsultohemi me të gjithë aktorët. Ne kemi disa kohë që po punojmë për një draft dhe një projekt. Ai u shty për shkak të zgjedhjeve të 30 qershorit. Jemi në diskutime në këtë moment me Prokurorinë e Përgjithshme për kategoritë që do të përfitojnë”, tha Gjonaj.

Sa i përket të miturve dhe grave të dënuara, Gjonaj u shpreh se është menduar të ketë kritere më lehtësuese.

“Në ndjeshmëritë e mija personale do doja që nga amnistia të përfitonin më shumë gratë dhe të miturit e dënuar. Pavarësisht veprave penale që kanë kryer dhe pavarësisht mosplotësimit të kritereve standarde që janë përdorur vite me parë për amnistinë duke përfshirë edhe subjekte të tjera si burrat, unë them që në këtë projekt-propozim së bashku me stafin që po punon dhe institucionet përkatëse, kemi planifikuar që të ketë një amnisti me kritere më lehtësuese për gratë dhe për të miturit”, tha Gjonaj

Në fund, ajo shtoi se edhe për të moshuarit do të ketë përfitime, ndërsa drafti do të duhet të kalohet nga Qeveria dhe më pas në Kuvend. “Drafti që jemi duke përgatitur parashikon diçka edhe për të moshuarit. Unë do ta propozoj që të kalojë me vendim në Qeveri, më pas është fjala e fundit e Kuvendit”, u shpreh Gjonaj.