Teuta zhvilloi ditën e sotme, miqësoren e parë në kuadër të përgatitjeve për Kupat e Europës.
Në “Niko Dovana” të Durrësit, ekipi i Shkëmbit priti Laçin në miqësore, dhe ishin kurbinasit ata që fituan me shifrat 1-2.
Në formacionin titullar, për durrsakët luante vetëm Todorovski, ndërkohë që blerjet e tjera e nisën nga stoli, ndërkohë tek kurbinasit binin në sy Turkaj, Teko apo Zaimi.
Në pjesën e parë, shifrat ishin të bardha, dhe ekipet e mbyllën pa gola. Në të dytën, ishte Laçi që gjeti dy herë rrugën e rrjetës. Në minutën e 73-të, Elvi Berisha, shënoi pas një krosimi nga e djathta. Topi u përplas në shtyllë, dhe brenda zone lojtari i Laçit nuk e pati të vështirë ta shtyjë në rrjetë.
Më pas, në minutën e 85-të, ishte Adolf Selmani, i ardhur nga klubi i Kastriotit, që shënoi golin e dytë për kurbinasit.
Ekipi i Shkëmbit ngushtoi shifrat në minutën e 88-të, me Lorenco Vilën që shënoi i vetëm përballë portierit Shala, pas një krosimi nga e djathta të Avdylit, por vetëm kaq nuk mjaftoi, dhe durrsakët në fund e mbyllën me humbje.