Ngjarja e një ditë më parë ku një i mitur u ra dhe u zhduk në lumin Fan të Mirditës teksa tentoi të merrte topin që i kishte rënë aty ishte mjaft e rëndë. Ndërkohë, autoritetet kanë nisur sot që në orët e para të mëngjesit kërkimet për gjetjen e trupit të fëmijës 10-vjeçar. Në lëvizje janë vënë forca të shumta policie dhe zjarrfikëse. Megjithatë, si pasojë e rrjedhës së fuqishme të lumit, kërkimet po kryhen me shumë vështirësi.
Për të ndihmuar kërkimet pritet të vijnë edhe polumbarët, të cilët do u bashkohen të afërmve, banorëve e policisë lokale që aktualisht janë duke e kërkuar. Në zonë vijon të ketë temperatura të ulëta që pengojnë kërkimet pa mjetet e duhura e gjithë rrjedha e lumit po monitorohet.
Kujtojmë se 10-vjeçari rrëshqiti dhe ra në lumë ndërsa po tentonte të merrte topin që i ra ndërsa luante. Banesa e tij ndodhej pranë lumit dhe në momentin që rrëshqiti ai nuk është parë më. Kërkimet u anuluan mbrëmë për shkak të errësirës për të vijuar prapë sot në mëngjes.