Policia e Shtetit dhe aq më pak Prokuroria, ende nuk kanë dalë të japin informacione mbi fatin e “mbretit të lojërave të fatit”, Ervis Martinaj edhe kur bëhen më shumë se dy muaj nga zhdukja e tij.
Sot për herë të parë, kreu i Policisë së Shtetit, Muhamet Rrumbullaku tha se policia është duke punuar për Martinajn, duke mos dhënë më detaje të tjera, pavarësisht se më herët kryeministri Edi Rama kishte kërkuar nga institucionet shtetërore që “t’i jepej fund kësaj telenovela!”.
Zhdukja e Martinajt duket se ka përfshirë drejtpërdrejtë edhe strukturat e policisë, pasi vetë efektivi i Forcave Operacionale Jeton Lami shërbente si badigard dhe shofer i tij.
Gazetarët e kronikës kanë raportuar më herët se Lami është “rrëfyer” te Gledis Nano mbi pagesat që merrnin shefat e komisariateve nga Martinaj pak para se kreu i Policisë së Shtetit të dorëhiqej.