Suedia ka hedhur një hap të rëndësishëm drejt kualifikimit të mëtejshëm në Euro 2020 pasi ka mundur sot Sllovakinë me rezultatin minimal 1-0 duke marrë përkohësisht kreun e Grupit E.
Pasi barazuan pa gola me Spanjën në një ndeshje që e kaluan të gjithën në mbrojtje, suedezët treguan pak nga loja e tyre ofensive edhe në pjesën e parë të ndeshjes, ku edhe Sllovakia nuk po thumbonte shumë. Por në të dytën, ekipet nisën një lojë të hapur në kërkim të një goli që mund ta bënte kualifikimin më të sigurt për të dy palët.
Fati në fund i buzëqeshi Suedisë, e cila me dyshen Isak-Kuaison arriti të fitonte një 11-metërsh, Forsberg nga pika e bardhë nuk gaboi e kështu shënoi golin e vetëm të këtij dueli. Kështu, nordikët morën tre pikë të arta duke u pozicionuar me 4 të tilla në kreun e grupit e bërë një hap thuajse të sigurt drejt vazhdimit të mëtejshëm në turne. Ndërsa për Sllovakinë, vendimtare do të jetë ndeshja e fundit në grup, kundër Spanjës.