Edhe pse u godit nga një pacient pa asnjë motiv, infeksionit Gent Stroni vazhdoi punën e tij deri në mbylljen e turnit, për të bërë të nesërmen denoncimin.Infeksionisti i Spitalit “Nënë Tereza” tregon incidentin që ndodhi mesditën e së dielës, ndërsa i bën thirrje qytetarëve që të kërkojnë ndihmë mjekësore në mjekun e familjes.
“Atë ditë isha roje dhe e nisa shërbimin deri në orën 8:00. Kishte fluks të madh dhe deri në orën 13:00 kisha 60-70 raste. Vjen zotëria me bashkëshorten dhe kishte blerë një vaksinë kundër gripit. I thash që nuk është urgjencë, por gjithsesi i kërkova të më linte pak kohë që të menaxhoja rastet që ishin problematike. Doli me nusen te dera dhe insistonte që t’ia bënim vaksinën në këmbë. E gjitha ndodhi brenda 4-5 minutave. Ndërsa isha pranë një pacienti, filloi të bërtiste dhe të argumentonte me infermieren. Në këto momente i them se po më pengonte dhe ky ishte momenti i ngritjes së tensionit dhe aty situata doli jashtë kontrollit. Filloi shtyrja dhe sharja deri në aktin e tij. Nuk ishte një lloj konfrontimi, por ai më qëlloi. Nga ky çast vazhdova punën”, tregon Stroni.
Ai vazhdon më tej duke treguar se kishte vijuar punën deri në orën 2:00, ndërsa denoncimin priti për ta bërë të nesërmen.