Spitali bashkiak Mat njoftoi sot se është ndarë nga jeta mjekut anestezist-reanimator Shaban Isedisha.
“Mbi 35 vjet shërbim e punë e palodhur pranë pacientëve, duke ju ofruar ndihmë mjekësore, shpresë, besim e kurajo për të triumfuar mbi sëmundjen. Ai do të jetojë në mendjet e zemrat e qindra pacientëve, të kolegëve, familjarëve e mbarë komunitetit matjan”, shkruajnë bluzat e bardha të Matit. Këshilli Bashkiak Mat, në një mbledhje jashtë radhe e shpalli mjekun e njohur “Qytetar Nderi” me 15 vota pro dhe asnjë kundër.
Këshilltarët që morën fjalën vlerësuan kontributin e madh që ka dhënë mjeku Shaban Isedisha për fushën e shëndetësisë.
“Për kontributin e lartë humanitar dhe profesional në fushën e mjekësisë, si anestezist-reanimator pranë spitalit bashkiak Mat, si prind shembullor, koleg i nderuar, si model i qytetarit të ndershëm e korrekt, duke pasqyruar vlera të larta morale e shoqërore në trevën e Matit”, thuhet në motivacionin e titullit të nderit.
Duke i shprehur ngushëllime familjes dhe miqve, kryebashkiaku Agron Malaj ka vlerësuar mjekun e njohur për profesionalizmin dhe përkushtimin e tij.
“Ndahet nga jeta mjeku i mirënjohur Shaban Sali Isedisha. Ngushëllime të sinqerta familjes, të afërmve dhe të gjithë komunitetit që e njohu dhe e respektoi për profesionalizmin dhe përkushtimin e tij ndaj të gjithëve”, nënvizon Malaj.
