Një shpërthim me eksploziv ka tronditur Tiranën mbrëmjen e sotme. Ngjarja ka ndodhur rreth orës 21:00 në një pallat pranë gjykatës së Tiranës në zonën e ‘Vasil Shantos’. Shpërthimi ka ndodhur te pallati i gjyqtarëve dhe prokurorëve në rrugën “Mihal Popi” në banesën e V. Stavrit, i cili ka qenë shënjestër e atentatit.
Tritoli ka qenë vendosur në katin e dytë në derën e banesës, ndërsa shpërthimi ka qenë i fortë. Nga të dhënat e para mendohet se tek dera e objektivit ka qenë vendosur 100-200 gr eksploziv. Fatmirësisht nga shpërthimi nuk raportohet për të lënduar, ndërsa janë shkaktuar dëme të shumta materiale. Dera kryesore është shkallmuar nga shpërthimi i fuqishëm, ndërsa janë thyer edhe xhamat e dritareve.
Shpërthimi është bërë me telekomandë, autorët mendohet se kanë qenë dy, ndërsa kanë shfrytëzuar errësirën për t’u larguar pas vendosjes së eksplozivit. Pallati i ndërtuar në vitet ’95-’96 njihet si i gjyqtarëve dhe prokurorëve, pasi kanë banuar dhe banojnë funksionarë të drejtësisë. Por nga të dhënat e para shënjestra nuk është pjesë e sistemit të drejtësisë.
Po punohet për sqarimin e rrethanave të ngjarjes, identifikimin dhe kapjen e autorit/ve”, thotë policia.
