COVID-19 nuk ka kursyer as moshat e reja. Kryetarja e LSI-së Monika Kryemadhi përmes një postimi në Facebook bën të ditur se ka humbur jetën nga koronavirusi në moshën 38-vjeçare koordinatori i LSI-së për Astirin, Entiol Laço.
Eno prej pak kohësh jetonte në Gjermani dhe ishte kthyer për të marrë pjesë aktivisht në fushatën elektorale të LSI-së për zgjedhjet e 25 prillit. Kryemadhi ka postuar mesazhin e fundit të tij një muaj më parë teksa shprehet se Eno do i mungojë të gjithëve tyre që e njohën.
“Mona si je? Fëmijet si janë? Unë kam ardhur dhe më ke deri në fund të fushatës.
Ky ishte mesazhi yt para 30 ditësh, kur më the se ishe kthyer nga Gjermania. Por dje, të gjithë u ndalëm, nuk folëm, shtangëm, sepse ti ike dhe na le përgjithmonë. Nuk duam të të përcjellim, të duam për vete, të duam këtu me ne. Por ti zgjodhe të ikësh sepse parajsa është më e mirë sesa kjo botë këtu e padrejtë.
Eno, ti ike dhe le vetëm Mirën me fëmijët, por të premtoj se ata nuk do të jenë kurrë vetëm, ne do jemi aty për ta gjithmonë.
Të duam Eno jonë, do na mungosh me shakatë e tua”, shkruan Kryemadhi.
Eno ishte i aktivizuar në LSI që në krijimet e kësaj force politike dhe la pas bashkëshorten dhe tre fëmijë të vegjël.
