Situata nga moti i keq, ka ende pasoja në qarkun e Shkodrës. Reshjet e shiut kanë pushuar prej disa ditësh tashmë e megjithatë në Shkodër vijon të ketë sipërfaqe toke të përmbytura.
Bashkia Shkodër njofton se nga raportimet e bëra mëngjesin e së martës, sipërfaqe në total e përmbytur në Bashkinë Shkodër janë 2150 Ha, me një rënie prej 200 Ha nga ora 08.00 e ditës së djeshme. Banesa me prezence uji në oborre e stalla në total janë 50. Në Njësinë Administrative Ana e Malit e përmbytur është një sipërfaqe prej 1200 Ha.
Sipas Bashkisë Shkodër, në rrugën e Obotit mund të kalohet vetëm me mjete të larta të ushtrisë dhe Ujësjellësi Oblika 1 dhe Oblika 2 momentalisht janë jashtë funksionit. Të pakalueshme janë edhe rruga Darragjat-Shirq pasi në vendin e quajtur Urrelat uji arrin në lartësinë 70 cm.