I pyetur nga gazetarët për një shkëmbim të mundshëm mes policëve të Kosovës të rrëmbyer dhe kriminelit serb Millun Millenkoviç, kryeministri Albin Kurti tha se një gjë e tillë nuk është aspak në planet e tj. Për të arrestimi i Millenkoviç ka shkaktuar panik tek kriminelët e tjerë të cilët nuk e mendonin se diçka e tillë mund të ndodhte.
“Tre policët që janë rrëmbyer nga njësia ushtarake e Serbisë, kanë qenë në një rrugë ilegale ku ndalohej kontrabanda. Përballë tyre kanë pasur njësi të specializuara të Serbisë. Në anën tjetër kemi një kriminel serb, që ka dosje të trashë të veprave kriminale të kryera në Kosovë. Këtu ka sundim ligji, republikë demokratike.
Arrestimi i Millenkovicit i ka bërë të panikosen të gjithë kriminelët. Nuk kanë mundur ta besojnë që ndodh arrestimi i tij. Prandaj kanë reaguar në atë mënyrë. Ne nuk bëjmë pazare. Nuk di që Beogradi ka kërkuar ndonjë lloj shkëmbimi. Atë edhe mund ta kërkojnë dicka të tillë, por ju nuk keni nevojë të paraqitni këtë si mundësi sepse jeni qytetarë të republikës sonë. Për çfarë shkëmbimi jeni duke folur?”,-tha Kurti.