Sëmundja e murtajës ka zgjeruar hartën e infektimit. Murtaja e ruminatëve tashmë ka mbërritur edhe në Lushnje e Gjirokastër.
Numri i vatrave me murtajë ka shkuar në 10, ndërsa numri i fermave të infektuara në 12. Sëmundja që i merr jetën bagëtive të imta është prezente nga veriu e deri në jug të Shqipërisë. Prezenca e këtij infeksioni në Gjirokastër vë në rrezik një numër të lartë bagëtish, pasi numri më i madh i fermave me dele dhe dhi gjenden në bashkinë e Gjirokastrës dhe Konispolit.
Masat parandaluese si ndalimi i tregtisë së gjësë gjallë, apo izolimi kullotave nuk e kanë frenuar përhapjen e murtajës.
Deri më tani numri i kafshëve të asgjësuar ka shkuar në 1200. Nëse kjo sëmundje merr fund para shtatorit ky do të jetë një lajm i mirë për blegtorinë shqiptare, temperaturat e larta janë në favor të fermerëve pasi virusi i murtajës nuk reziston gjatë në diell. Por që murtaja të asgjesohet para vjeshtës, mjekët veterinar kërkojnë edhe bashkëpunimin e fermerëve që të lajmërojnë mënjeherë në rast se në tufat e tyre shfaqet murtaja e ruminatëve.
Deri më tani Ministria e Bujqësisë ka dhënë vetëm këshilla se si mund të parandalohet murtaja.
Murtaja në Shqipëri mbërriti si pasojë e futjes së kafshëve kontrabandë nga Rumania të cilat shiteshin në tregjet e gjësë së gjallë më certifikata të falsifikuara. Dështimi i kontrolleve veterinare në doganë apo në tregjet e kafshëve ka bërë që murtaja sot të jetë prezente në Shkodër, Dibër, Bulqizë, Tiranë, Korcë, Devoll, Skrapar, Lushnje dhe Gjirokastër.