Zv.drejtori i Përgjithshëm Albert Dervishaj vizitoi këtë të premte në spitalin e Traumës në Tiranë punonjësin e policisë që u plagos me armë zjarri gjatë ndërhyrjes për të ndaluar një drejtues mjeti që qarkullonte në sens të kundërt të lëvizjes në Durrës.
Dervishaj i uroi shërim të shpejtë dhe e falënderoi për guximin dhe vendosmërinë për t’u përballur me paligjshmërinë dhe krimin.
“Veprime të tilla të guximshme, janë inkurajim për të gjithë punonjësit e Policisë, por mbi të gjitha janë indice për qytetarët që të besojnë dhe të mbështesin akoma më shumë Policinë, pasi punonjësit e Policisë sakrifikojnë shumë, madje në raste të veçanta deri në më sublimen, për të mirën e përgjithshme dhe në këtë kuadër dëshiroj të përgëzoj gjithë grupin e punës që ishte mbrëmë në detyrë dhe u përball me një drejtues mjeti të armatosur dhe nën ndikimin e alkoolit, i cili duke qarkulluar në sens të kundërt nuk iu bind urdhrit të Policisë për të ndaluar por përkundrazi, rrezikoi jetët e tyre. Ndërhyrja e guximshme, si dhe vendosmëria që treguan gjatë ndjekjes dhe arrestimit të tij, pavarësisht se drejtuesi i mjetit tentoi të largohej duke mbajtur në dorë një armë zjarri, tregon edhe njëherë se Policia e Shtetit është e aftë dhe e vendosur për t’u përballur dhe për ta luftuar krimin”.