Luftoi deri në fund, por zemra e Artan Lames pushoi së rrahuri përfundimisht këtë të premte. Lajmin e trishtë e konfirmuan bashkëshortja Mirela dhe e ëma e tij. Diana Lame shkruan se i biri ka ndërruar jetë. Por ka shtuar se për detajet e varrimit do të ndajë një njoftim të dytë, pasi trupi i 58-vjeçarit të mbërrijë në atdhe nga Gjermania.
Postimi i plotë
Të nderuar shokë, miq dhe dashamirës, nuk më bën dora të shkruaj për humbjen e të shtrenjtit, djalit tim të dashur, Artan Lame. E megjithatë, ky moment i mallkuar erdhi dhe më shoi edhe atë fije shprese që mu ngjall dje. Shpresoja… sepse më premtoi se do të kthehej:
“… Nuk e kam mendjen te e nesërmja (që do të operohesha), jam mirë, jam i qetë, por po përqendrohem te Muzeu”. Edhe nga gjumi po ta zgjoheshe, për Muzeun fliste. Kur Tanin të ma sjellin këtu, do t’ju bëjmë të ditura procedurat e mëtejshme”.
Ish-kreu i Kadastrës ka ndërruar jetë në Mynih të Gjermanisë, pasi kishte pësuar një ishemi një muaj më parë. Disa ditë më parë, ai iu nënshtrua një ndërhyrjeje të vështirë në zemër, e cila e çoi në koma cerebrale, por ishte ende në jetë. Jeta e tij ka pushuar së rrahuri gjatë paradites së sotme.